ಮಹಿಳೆ ಮನೆಯಿಂದ ಹೊರಡಬೇಕಾದವಳೇ?.
ಯುದ್ಧಕ್ಕೆ ಅನುಮತಿ ಕೇಳಿದ ಮಹಿಳೆಯೊಂದಿಗೆ ನಬಿ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರ ಉತ್ತರ ಹೇಗಿತ್ತು?.
ರಾಜಕೀಯ ಲಾಭಕ್ಕಾಗಿ ಇಸ್ಲಾಮಿಕ್ ಚರಿತ್ರೆಯನ್ನೇ  ತಿರುಚುವವರ ಮಾತಿಗೆ ಬಲಿಯಾಗದಿರಲು ಇದು ಓದಿ...... ಅರ್ಥೈಸಿಕೊಳ್ಳಿ.

*ಮಹಾತ್ಮರ ಗ್ರಂಥದಿಂದ......*

ಅನ್ಸಾರಿ ಸ್ವಹಾಬಿಯಾದ ಯಝೀದಿನ ಮಗಳು ನಬಿ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರ ಬಳಿ ಬಂದು  ಹೇಳಿದರು. "ನಾನು ಬಂದಿರುವುದು ಮಹಿಳಾ ಸಮೂಹದ ಪ್ರತಿನಿಧಿಯಾಗಿ. ಪೂರ್ವ ಪಶ್ಚಿಮ ಭಾಗದಲ್ಲಿರುವ ಮಹಿಳೆಯರೆಲ್ಲರೂ ನಾನು ಈ ಕಡೆ ಬಂದದ್ದು ತಿಳಿದವರೂ ನನ್ನ ಅಭಿಪ್ರಾಯವನ್ನು ಬೆಂಬಲಿಸುವವರೂ ಆಗಿದ್ದಾರೆ". ನಂತರ ಮುಂದುವರಿಸಿದರು. "ಓ ನಬಿಯ್ಯರೇ, ತಮ್ಮನ್ನು ಅಲ್ಲಾಹನು ನಿಯೋಗಿಸಿರುವುದು ಸಕಲ ಸ್ತ್ರೀ ಪುರುಷರಿಗೂ ಪ್ರವಾದಿಯನ್ನಾಗಿ.  ಮಹಿಳೆಯರಾದ ನಾವೆಲ್ಲರೂ ತಮ್ಮನ್ನೂ, ತಮ್ಮ ಇಲಾಹನನ್ನೂ  ವಿಶ್ವಾಸವಿರಿಸಿದವರೂ, ಪುರುಷರಾದ ತಮ್ಮಂತಹವರ ಮನೆಗಳ ಗೋಡೆಗಳ ನಡುವೆ ಅವಿತು ಕೊಂಡಿರುವವರೂ, ಪುರುಷರ ಆಸೆ ಈಡೇರಿಸುವವರೂ, ನಿಮ್ಮ ಸಂತತಿಗಳನ್ನು ಸಾಕಿ ಬೆಳೆಸುವವರೂ ಆಗಿದ್ದೇವೆ. ಆದರೆ ಪುರುಷರು ನಮಗಿಂತಲೂ ಶ್ರೇಷ್ಟತೆಯಿರುವವರು. ನೀವು ಜುಮುಅ ಜಮಾ ಅತ್ ಗಳಲ್ಲಿ ಭಾಗವಹಿಸುತ್ತಾ, ರೋಗ ಸಂದರ್ಶನ, ಜನಾಝ ಪರಿಪಾಲನೆ, ಒಂದಕ್ಕಿಂತ ಅಧಿಕ ಹಜ್ ಮುಂತಾದವುಗಳನ್ನು ನಿರ್ವಹಿಸಿ, ಅದಕ್ಕೆಲ್ಲಕ್ಕಿಂತಲೂ ಶ್ರೇಷ್ಟವಾದ ಯುದ್ಧಗಳಲ್ಲಿ ಭಾಗವಹಿಸುತ್ತೀರಿ. ನೀವು ಯುದ್ಧಕ್ಕೋ ಹಜ್ ಗೋ ಹೊರಟು ನಿಂತರೆ ನಾವು ನಿಮ್ಮ ಸಂಪತ್ತನ್ನು ಸಂರಕ್ಷಿಸುತ್ತೇವೆ. ನಿಮ್ಮ ವಸ್ತ್ರವನ್ನು ತೊಳೆಯುವುದೂ, ಅದನ್ನು ಸ್ಟಿಚ್ ಮಾಡಿಕೊಡುವವರೂ ನಾವೇ. ಆದ್ದರಿಂದ ಮೇಲೆ ತಿಳಿಸಿದ ವಿಷಯಗಳಲ್ಲಿ ಮಹಿಳೆಯರಾದ ನಮಗೂ ಪುರುಷರೊಂದಿಗೆ ಪಾಲ್ಗೊಳ್ಳಬಾರದೇ?".

ಇದು ಕೇಳಿದಾಕ್ಷಣ ನಬಿ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರು ಸುತ್ತಲೂ ಇದ್ದ ಸ್ವಹಾಬಿಗಳತ್ತ ಮುಖ ಮಾಡಿ ಕೇಳಿದರು. "ತನ್ನ ಧರ್ಮದ ಕುರಿತು ಇಷ್ಟೊಂದು ಕಾಳಜಿಯಿರುವ ಮಹಿಳೆಯ ಮಾತನ್ನು ನೀವು ಕೇಳಿದ್ದೀರಾ?". ಅವರು ಹೇಳಿದರು. "ನಾವು ಮಹಿಳೆಯರ ಪೈಕಿ ಇಷ್ಟೊಂದು ಪಕ್ವತೆಯಿರುವವರು ಇದ್ದಾರೆಂದು ಊಹಿಸಿರಲಿಲ್ಲ".

ನಬಿ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರು ಆ ಮಹಿಳೆಯೊಂದಿಗೆ ಹೇಳಿದರು.  "ನೀನು ಯಾರ ಪ್ರತಿನಿಧಿಯಾಗಿ ಬಂದಿರುವೆಯೋ ಅವರ ಬಳಿ ತೆರಳಿ ಅವರೊಂದಿಗೆ ತಿಳಿಸು. ನೀವೆಲ್ಲರೂ ಅವರ ಪತಿಯರಿಗೆ ಬದ್ಧರಾಗಿ, ಪತಿಯರ ಪ್ರೀತಿಗೆ ಪಾತ್ರರಾಗಿ, ಮನೆಯೊಳಗೆ ಅವಿತು ಕುಳಿತರೆ ಮೇಲೆ ತಿಳಿಸಿದ ಸತ್ಕರ್ಮಗಳಿಗೆ ಸಮಾನವಾದ ಪ್ರತಿಫಲವಿದೆ".

ಇದನ್ನು ಕೇಳಿ ಆ ಮಹಿಳೆಯು ಸಂತೋಷ ಭರಿತರಾಗಿ ತಕ್ಬೀರ್ ಹೇಳುತ್ತಾ ಹೊರಟು ಹೋದರು.
(ಬಹು ಹಾಫಿಳ್ ಇಬ್ನು ಅಸಾಕಿರ್(ರ)ರವರ ತಹ್ದೀಬುತ್ತಾರೀಖಿದ್ದಿಮಶ್ಕಿಲ್ ಕಬೀರ್ ಎಂಬ ಗ್ರಂಥ)

*ಜುನೈದ್  ಸಖಾಫಿ ಜೀರ್ಮುಕ್ಕಿ*