*ಇನ್ನೊಬ್ಬರ ಮಾನ ಹರಾಜು ಮಾಡಬೇಡಿ. ಮುಂದೆ, ಅದು ನಮ್ಮ ಮಾನ ಹರಾಜಾಗಲು ಕಾರಣವಾದೀತು.!*

ಕೆಲವರಿಗಂತೂ ಇನ್ನೊಬ್ಬರ ನ್ಯೂನತೆಗಳನ್ನು ಚಿತ್ರೀಕರಿಸಿ, ಅದನ್ನು ಇತರರಿಗೆ ರವಾನಿಸುವುದೆಂದರೆ, ಎಲ್ಲಿಲ್ಲದ ಆಸಕ್ತಿ. ಹೀಗೆ ಇನ್ನೊಬ್ಬರ ಮಾನ ಹರಾಜು ಹಾಕಿದುದರ ಪರಿಣಾಮ ಮುಂದೊಂದು ದಿನ ತನಗೂ ಅಂತಹ ಪರಿಸ್ಥಿತಿ ಬಂದೊದಗುವ ಸಾದ್ಯತೆ ಇರಬಹುದೆಂಬ ಕಲ್ಪನೆಯೂ ಅಂತಹವರಿಗೆ ಇರುವುದಿಲ್ಲ.

ಒಬ್ಬ ವ್ಯಕ್ತಿ ತಪ್ಪು ಮಾಡಿದರೆ, ಅದು ಅವನು ಮತ್ತು ಅಲ್ಲಾಹನಿಗೆ ಸಂಬಂಧಿಸಿದ ಪಾಪವಾಗಿದೆ. ತಪ್ಪು ಮಾಡಿದ ವ್ಯಕ್ತಿ ಅಲ್ಲಾಹನಲ್ಲಿ ಕ್ಷಮೆ ಕೇಳಿದರೆ, ಅಲ್ಲಾಹು ಕ್ಷಮಿಸಬಹುದು. ಆದರೆ, ಅದನ್ನು ನಾವು ಹೇಳಿ ನಡೆದರೆ, ಪ್ರಚಾರ ಮಾಡಿದರೆ, ಅದು ನಮಗೂ ಅವರಿಗೂ ಸಂಬಂಧಪಡುವ ಪಾಪ (ಗೀಬತ್) ವಾಗಿಬಿಡುತ್ತದೆ. ಗೀಬತ್ ಹೇಳಲ್ಪಟ್ಟವರು ಕ್ಷಮಿಸದ ಹೊರತು, ಗೀಬತ್ ಹೇಳಿದವನಿಗೆ ಅಲ್ಲಾಹನ ಬಳಿ ಕ್ಷಮೆ ಇರುವುದಿಲ್ಲ. *"ಗೀಬತ್" ವ್ಯಭಿಚಾರ ಕ್ಕಿಂತಲೂ ಮಹಾ ಪಾಪವಾಗಿದೆ"* (ಹದೀಸ್)
"ಗೀಬತ್" ಎಂಬ ಪಾಪದ ಗಂಭೀರತೆ ಎಷ್ಟಿದೆ ಎಂಬುದನ್ನು ಈ ಹದೀಸ್ ನಿಂದ ನಮಗೆ ಅರ್ಥಮಾಡಿಕೊಳ್ಳಬಹುದು.

"ನಮ್ಮ ಬೆನ್ನು ನಾವು ಕಾಣುವುದಿಲ್ಲ" ಎಂಬ ಹಿರಿಯರ ಮಾತಿನಂತೆ, ನಮ್ಮ ಭವಿಷ್ಯವನ್ನು ನಾವು ಅರಿತಿರುವುದಿಲ್ಲ. ನಮ್ಮ ಭವಿಷ್ಯವನ್ನು ಒಳ್ಳೆಯದು ಅಥವಾ ಕೆಟ್ಟದು ಮಾಡುವ ಅವಕಾಶ ನಮ್ಮ ಕೈಯಲ್ಲೇ ಇರುತ್ತದೆ. ನಾವು ಜನರಿಗೆ ಒಳಿತನ್ನು ಬಯಸಿದರೆ, ಅಲ್ಲಾಹು ನಮಗೆ ಒಳಿತನ್ನು ಕರುಣಿಸುತ್ತಾನೆ. ಕೆಟ್ಟದನ್ನು ಬಯಸಿದರೆ, ಆ ಕೆಟ್ಟದು ನಮಗೇ ದಕ್ಕುತ್ತದೆ. ಅದರಂತೆ, ಇನ್ನೊಬ್ಬರ ಮಾನವನ್ನು ನಾವು ಹರಾಜು ಮಾಡಿದರೆ, ನಮ್ಮ ಮಾನವನ್ನು ಅಲ್ಲಾಹು ಹರಾಜು ಮಾಡುತ್ತಾನೆ. ಇನ್ನೊಬ್ಬರ ಮಾನವನ್ನು ನಾವು ಉಳಿಸಿದರೆ, ನಮ್ಮ ಮಾನವನ್ನು ಅಲ್ಲಾಹು ಕಾಪಾಡುತ್ತಾನೆ.

ಇನ್ನೊಬ್ಬರ ತಪ್ಪನ್ನು ಪ್ರಚಾರ ಮಾಡಿ, ಅವರ ಮಾನ ಹರಾಜು ಹಾಕುವವರು ಚಿಂತಿಸಬೇಕು,  ನಮ್ಮಿಂದ ಅದಕ್ಕಿಂತಲೂ ದೊಡ್ಡದಾದ ಪಾಪವನ್ನು ಮಾಡಿಸಿ, ನಮ್ಮ ಮಾನವನ್ನು ಇನ್ನೊಬ್ಬರಿಂದ ಹರಾಜು ಮಾಡಿಸಲು ಅಲ್ಲಾಹನಿಗೆ ಸಾದ್ಯವಿಲ್ಲವೇ ಎಂದು.   ನಮಗೆ ಇಷ್ಟವಿಲ್ಲದ ನಮ್ಮ ಒಂದು ಫೋಟೋ ಅಥವಾ ವೀಡಿಯೋ ವನ್ನು ಯಾರಾದರೂ forward ಮಾಡಿದರೆ, ನಮಗೆಷ್ಟು ಬೇಸರವಾಗುವುದಿಲ್ಲ. ಅದರಂತೆ, ಇನ್ನೊಬ್ಬರ ಮನಸ್ಥಿತಿಯನ್ನು ನಾವೇಕೆ ಅರ್ಥಮಾಡಿಕೊಳ್ಳಬಾರದು.
ಇನ್ನೊಬ್ಬರ ಮಾನ ಹರಾಜು ಮಾಡುವುದೆಂದರೆ, ಅವರಿಗೆ ನಾವು ಅನ್ಯಾಯ ಮಾಡಿದಂತೆ. *ಅನ್ಯಾಯಕ್ಕೊಲಗಾದವರು ಕಣ್ಣೀರಿಟ್ಟು ಪ್ರಾರ್ಥಿಸಿದರೆ, ಅವರ ಕಣ್ಣೀರು ನಮಗೆ ತಟ್ಟದಿರುತ್ತದೆಯೇ?.*

"ತನ್ನ ಸಹೋದರನ ನ್ಯೂನತೆಗಳನ್ನು ಮರೆಮಾಚುವವನ ನ್ಯೂನತೆಗಳನ್ನು ಪುನರುತ್ಥಾನದ ದಿನದಂದು ಅಲ್ಲಾಹನು ಮರೆಮಾಚಿಡುವನು" (ಬುಖಾರಿ-ಮುಸ್ಲಿಂ) (ಅಲ್ಲಾಹು ಅವನ ಮುಖವನ್ನು ನರಕದಿಂದ ತಡೆಯುವನು).
*ಇಂತಹ ಸೌಭಾಗ್ಯ ಶಾಲಿಗಳಲ್ಲಿ ನಾವು ಒಳಪಡುವುದು ಬೇಡವೇ? ಅಲ್ಲಾಹು ಅನುಗ್ರಹಿಸಲಿ, ಆಮೀನ್.*

ಅಲ್ಲಾಹನೇ, ಇಹ-ಪರದಲ್ಲೂ ನಮ್ಮ ಹಿಝ್ಝತನ್ನು ನೀನು ಸಂರಕ್ಷಿಸು,  ಇನ್ನೊಬ್ಬರ ನ್ಯೂನತೆಗಳನ್ನು ಹೇಳಿ ನಡೆಯುವಂತಹ ಮಹಾ ಪಾಪಗಳಿಂದ ನಮಗೆ ವಿಮುಕ್ತಿ ನೀಡು, ಆಮೀನ್.

*ಮುಹಮ್ಮದ್ ಇಕ್ಬಾಲ್, ಮಂಗಳಪೇಟೆ.*