ಉರೂಸ್ ಆಚರಣೆ ಇಸ್ಲಾಮಿನಲ್ಲಿ.

ಭಾಗ -12

📝 ಟಿ.ಎಂ ಮುಹ್ಯಿದ್ದೀನ್ ಕಾಮಿಲ್ ಸಖಾಫಿ , ತೋಕೆ.

ಮಹಾ ಪುರುಷರಾಗಿದ್ದ ಗುಹೆ ನಿವಾಸಿಗಳು ವಾಸಿಸಿದ ಸ್ಥಳದಲ್ಲಿ ಅಂದಿನ ಮುಸ್ಲಿಮರು ಅವರ ಬರ್ಕತ್ ಪಡೆಯಲು ಕಟ್ಟಡ ನಿರ್ಮಿಸಿ ಅದರಲ್ಲಿ ನಮಾಜು ಮಾಡುತ್ತಿದ್ದರೆಂದು ಪವಿತ್ರ ಖುರ್ ಆನ್ ಯಾವುದೇ ಸಂಶಯಕ್ಕೆ ಎಡೆಯಿಲ್ಲದೆ ತಿಳಿಸುತ್ತದೆ.ಇದರಿಂದ ಮಹಾ ಪುರುಷರು ಸಂಪರ್ಕವಿರಿಸಿದ ಸ್ಥಳಕ್ಕೆ ಮಹತ್ವವಿದೆಯೆಂದೂ ತಿಳಿದು ಬರುತ್ತದೆ.ಮಾತ್ರವಲ್ಲ ಅಂದಿನ ಮುಸ್ಲಿಮರು ಅಲ್ಲಿ ವರ್ಷಕ್ಕೊಮ್ಮೆ ಸೇರುತ್ತಿದ್ದರು ಹಾಗೂ ಸಮಾರಂಭ ನಡೆಸುತ್ತಿದ್ದರು ಎಂಬುವುದರಿಂದ ಮಹಾ ಪುರುಷರ ದರ್ಗಾಗಳ ಬಳಿ ಉರೂಸ್ ನಡೆಸುವುದು ಉತ್ತಮ ಕಾರ್ಯವೆಂದೂ ಸ್ಪಷ್ಟವಾಗುತ್ತದೆ.
ಅದೇ ರೀತಿ ಔಲಿಯಾಗಳ ದರ್ಗಾಗಳ ಮೇಲೆ ಕಟ್ಟಡ ನಿರ್ಮಿಸುವುದು ಉತ್ತಮ ಕಾರ್ಯವೆಂದೂ ವೇದ್ಯವಾಗುತ್ತದೆ.

ಇಮಾಮ್ ನವವೀ ರಲಿಯಲ್ಲಾಹು ಅನ್ಹು ಹೇಳುತ್ತಾರೆ,
" ಮುಸ್ಲಿಮನಿಗೂ , ದ್ಸಿಮ್ಮಿ ( ಮುಸ್ಲಿಂ ರಾಷ್ಟ್ರದಲ್ಲಿ ಸರಕಾರಕ್ಕೆ ತೆರಿಗೆ ಕೊಟ್ಟು  ಜೀವಿಸುವ ಅಮುಸ್ಲಿಮ್ ) ಗೂ ಮಸ್ಜಿದ್ಲ್ ಅಖ್ಸಾ ಹಾಗೂ ಇತರ ಮಸೀದಿಗಳ ಜೀರ್ಣೋದ್ದಾರಕ್ಕೂ ಮತ್ತು ಪ್ರವಾದಿಗಳ , ವಿದ್ವಾಂಸರ ಹಾಗೂ ಸಜ್ಜನರ ಖಬರ್ ಗಳ್ ಜೀರ್ಣೋದ್ದಾರಕ್ಕೂ ವಸಿಯ್ಯತ್ ಮಾಡಬಹುದಾಗಿದೆ.ಏಕೆಂದರೆ ಅದರಲ್ಲಿ ಝಿಯಾರತನ್ನು ಜೀವಂತಗೊಳಿಸುವುದು ಮತ್ತು ಬರ್ಕತ್ ಪಡೆಯುವುದು ಎಂಬ ಪುಣ್ಯ ಕಾರ್ಯವು ಒಳಗೊಂಡಿದೆ." ( ರೌಳ 98/6)

ಇಮಾಮ್ ಗಝ್ಝಾಲಿ ರಲಿಯಲ್ಲಾಹು ಅನ್ಹು ಹೇಳುತ್ತಾರೆ,
" ಅಂಬಿಯಾಗಳ ಖಬರ್  ಗಳ ಜೀರ್ಣೋದ್ದಾರಕ್ಕಾಗಿ ವಸಿಯ್ಯತ್ ಮಾಡುವುದು ಅನುವದನೀಯವಾಗಿದೆ.
( ವಜೀಝ್ 162/ 1)

ಇನ್ನಷ್ಟು ಪುರಾವೆಗಳು .......

ಸುಫ್ಯಾನುತ್ತಮ್ಮಾರ್ ರಲಿಯಲ್ಲಾಹು ಅನ್ಹು ಹೇಳುತ್ತಾರೆ,
" ನಾನು ಪ್ರವಾದಿ ಸಲ್ಲಲ್ಲಾಹು ಅಲೈಹಿವಸಲ್ಲಮರ ಖಬರ್ ಶರೀಫನ್ನು ಕಂಡಿದ್ದೇನೆ.ಅದು ಭೂಮಿಯಿಂದ ಎತ್ತರಿಸಲ್ಪಟ್ಟಿತ್ತು." (ಬುಖಾರಿ 186/1)
ಇದರ ವ್ಯಾಖ್ಯಾನದಲ್ಲಿ ಇಮಾಮ್ ಇಬ್ನ್ ಹಜರುಲ್ ಅಸ್ಕಲಾನಿ ಹೇಳುತ್ತಾರೆ,
" ಮುಸನ್ನಮ್ ಎಂದರೆ ಎತ್ತರಿಸಲ್ಪಟ್ಟಿತ್ತು ಎಂದಾಗಿದೆ".
( ಫತ್ ಹುಲ್ ಬಾರಿ 417/ 4

ಅರಬೀ ನಿಘಂಟುವಾದ ಮುಅ್ ಜಮುಲ್ ವಸೀತ್ ನಲ್ಲಿ ಸನ್ನಮ ಎಂಬುದುರ ಅರ್ಥ ವಿವರಿಸುವುದನ್ನು ನೋಡಿ,
" ಸನ್ನಮ ಎಂದರೆ ಸಮತಲಗೊಳಿಸದೆ ಒಂಟೆಯ ಡುಬ್ಬದಂತೆ ಭೂಮಿಯಿಂದ ಎತ್ತರಿಸುವುದಾಗಿದೆ."
( ಮುಅ್ ಜಮುಲ್ ವಸೀತ್ 455)

ಇದರಿಂದ ಮುಸನ್ನಮ್ ಎಂದರೆ ಕೇವಲ ಉಬ್ಬುಗೊಳಿಸಲ್ಪಟ್ಟದ್ದು ಮಾತ್ರವಲ್ಲ ಭೂಮಿಯಿಂದ ಎತ್ತರಿಸಲ್ಪಟ್ಟದ್ದೂ ಕೂಡಾ ಆಗಿದೆಯೆಂದು ವ್ಯಕ್ತವಾಯಿತು.ಆದ್ದರಿಂದ ಪ್ರವಾದಿ ಸಲ್ಲಲ್ಲಾಹು ಅಲೈಹಿವಸಲ್ಲನರ ಖಬರ್ ಶರೀಫ್ ಭೂಮಿಯಿಂದ ಎತ್ತರಿಸಲ್ಪಟ್ಟಿತ್ತು ಎಂದು ವ್ಯಕ್ತವಾಯಿತು.

ಬಹುಮಾನ್ಯರಾದ ಖಾರಿಜತ್ ಬಿನ್ ಝೈದ್ ರಲಿಯಲ್ಲಾಹು ಅನ್ಹು ಹೇಳುತ್ತಾರೆ,
"ನನಗೆ ಗೊತ್ತಿದೆ , ನಾವು ಯುವಕರಾಗಿದ್ದಾಗ ಅಂದರೆ ಉಸ್ಮಾನ್ ರಲಿಯಲ್ಲಾಹು ಅನ್ಹು ರವರ ಕಾಲದಲ್ಲಿ ಉಸ್ಮಾನ್ ಬಿನ್ ಮಳ್ ಊನ್ ರಲಿಯಲ್ಲಾಹು ಅನ್ಹುರವರ ಖಬರಿನಷ್ಟು ಜಿಗಿಯುವವನು ನಮ್ಮ ಪೈಕಿ ಅತೀ ದೊಡ್ಡ ಜಿಗಿತಗಾರನಾಗಿದ್ದನು."
( ಬುಖಾರಿ 181/1)

ಆ ಸ್ವಹಾಬಿಯ ಖಬರಿನ ಎತ್ತರಕ್ಕೆ ಜಿಗಿಯುವವನನ್ನು ಅತೀ ದೊಡ್ಡ ಜಿಗಿತಗಾರನಾಗಿ ಪರಿಗಣಿಸಬೇಕಾದರೆ ಅವರ ಖಬರ್ ಅತೀ ಎತ್ತರವಾಗಿತ್ತೆಂದು ಸ್ಪಷ್ಟವಲ್ಲವೇ?

ಇದರ ವ್ಯಾಖ್ಯಾನದಲ್ಲಿ ಇಮಾಮ್ ಅಸ್ಖಲಾನಿ ರಲಿಯಲ್ಲಾಹು ಅನ್ಹು ಹೇಳುತ್ತಾರೆ,
ಈ ಹದೀಸಿನಿಂದ ಖಬರನ್ನು ಭೂಮಿಯಿಂದ ಎತ್ತರಿಸುವುದು ಅನುವದನೀಯವೆಂದು ತಿಳಿದು ಬರುತ್ತದೆ." ( ಫತ್ ಹುಲ್ ಬಾರಿ 365/ 4)

ಮುಂದುವರಿಯುವುದು...