ಉರೂಸ್ ಆಚರಣೆ ಇಸ್ಲಾಮಿನಲ್ಲಿ.

ಭಾಗ -3

📝 ಟಿ.ಎಂ ಮುಹ್ಯಿದ್ದೀನ್ ಖಾಮಿಲ್ ಸಖಾಫಿ, ತೋಕೆ.

ಇನ್ನು ಉರೂಸ್ ನಲ್ಲಿ ನಡೆಯುವ ಮುಖ್ಯವಾದ ಕಾರ್ಯಗಳೇನೆಂದೂ ಅದಕ್ಕಿರುವ ಪುರಾವೆಯೇನೆಂದೂ ನೋಡೋಣ.
1.ವಿಶೇಷವಾದ ಸಾಮೂಹಿಕ ಝಿಯಾರತ್:
         ಉರೂಸ್ ವೇಳೆ ನಡೆಯುವ ಪ್ರಮುಖ ಕಾರ್ಯವಾಗಿದೆ ಝಿಯಾರತ್.ಇದು ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ಸುನ್ನತ್ತಾಗಿ ಕಲಿಸಿಕೊಟ್ಟ ಕಾರ್ಯವಾಗಿದೆ.ಅದರಲ್ಲಿ ಯಾರಿಗೂ ಭಿನ್ನಭಿಪ್ರಾಯವಿಲ್ಲ.ಇದನ್ನು ನಿಶ್ಚಿತವಾದ ದಿವಸಗಳಲ್ಲಿ ನಡೆಸುವುದು ಕೂಡಾ ಪ್ರವಾದಿ ಚರ್ಯೆಯಾಗಿದೆ.

           ಅಬೂ ಹುರೈರ ರಳಿಯಲ್ಲಾಹು ಅನ್ಹು ಹೇಳುತ್ತಾರೆ,
ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ಎಲ್ಲಾ ವರ್ಷದ ಕೊನೆಯಲ್ಲಿ ಉಹ್ದ್ ಶುಹದಾಗಳ ಖಬರ್ ಸಂದರ್ಶಿಸುತ್ತಿದ್ದರು ಹಾಗೂ ಅಸ್ಸಲಾಮು ಅಲೈಕುಮ್ ಬಿಮಾ ಸ್ವಬರ್ತುಮ್ ಫನಿ ಅಮ ಉಖ್ ಬದ್ದಾರ್ ( ಅಥ: ಎಲ್ಲಾ ಕಷ್ಟಗಳನ್ನು ಸಹಿಸಿ ನಿಮ್ಮ ಶರೀರವನ್ನು ಇಸ್ಲಾಮಿಗೆ ತ್ಯಾಗ ಮಾಡಿದ  ಕಾರಣಕ್ಕಾಗಿ ನಿಮ್ಮ ಮೇಲೆ ಅಲ್ಲಾಹನ ರಕ್ಷೆ ಇರಲಿ.ಪಾರತ್ರಿಕ ಭವನವು ಅತ್ಯುತ್ತಮ ಭವನವಾಗಿದೆ.) ಎಂದು ಪ್ರಾರ್ಥಿಸುತ್ತಿದ್ದರು.ಮಾತ್ರವಲ್ಲ ಅಬೂಬಕರ್ ಸಿದ್ದೀಕ್ , ಉಮರ್ , ಹಾಗೂ ಉಸ್ಮಾನ್ ರಳಿಯಲ್ಲಾಹು ಅನ್ಹುಮ್ ಹೀಗೆ ವರ್ಷದ ಕೊನೆಯಲ್ಲಿ ಅವರ ಖಬರ್ ಸಂದರ್ಶಿಸುತ್ತಿದ್ದರು.( ಮುಸನ್ನಫ್ ಅಬ್ದಿರ್ರಝ್ಝಾಕ್ 574/3, ತಫ್ಸೀರುರ್ರಾಝಿ 47/ 19, ಇಬ್ನ್ ಕಸೀರ್ 571/2, ಇಬ್ನ್ ಜರೀರ್ 96/7, ಅದ್ದುರ್ರುಲ್ ಮಂಸೂರ್ 58/4)
ಉಹ್ದ್ ಯುಧ್ದದಲ್ಲಿ ರಕ್ತ ಸಾಕ್ಷಿಯಾದ ಶುಹದಾಗಳ ಖಬರನ್ನು ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ಹಾಗೂ ಖುಲಫಾಗಳು ಪ್ರತಿ ವರ್ಷವೂ ಸಂದರ್ಶಿಸುತ್ತಿದ್ದರೆಂದು  ಈ ಹದೀಸ್ ನಿಂದ ಯಾವುದೇ ಸಂಶಯಕ್ಕೆಡೆಯಿಲ್ಲದ ರೀತಿಯಲ್ಲಿ ಸ್ಪಷ್ಟವಾಗುತ್ತದೆ.ಇದರಿಂದ ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ನಿಶ್ಚಿತವಾದ ಸಮಯದಲ್ಲಿ ಝಿಯಾರತ್ ಮಾಡುತ್ತಿದ್ದರೆಂದು ಯಾವುದೇ ಅಲ್ಪಜ್ಞಾನಿಗೂ ಕೂಡಾ ತಿಳಿಯಬಹುದು. ಉರೂಸ್ ಕೂಡಾ ಇದುವೇ ಆಗಿದೆ.ಅಂದರೆ ನಿಶ್ಚಿತವಾದ ಸಮಯದಲ್ಲಿ ಝಿಯಾರತ್ ಮಾಡುವುದು.ಆದರೆ ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ಉಹ್ದ್ ಶುಹದಾಗಳ ಉರೂಸನ್ನು ಒಂದು ವರ್ಷಕ್ಕೊಮ್ಮೆ ಆಚರಿಸಿದರೆ ಇಂದು ಕೆಲವೊಮ್ಮೆ ಎರಡು ವರ್ಷಕ್ಕೊಮ್ಮೆ, ಮೂರು ವರ್ಷಕ್ಕೊಮ್ಮೆ , ಐದು ವರ್ಷಕೊಮ್ಮೆ ,ಹೀಗೆ ಆಚರಿಸಲಾಗುತ್ತದೆ ಅಷ್ಟೇ.ಒಂದು ಸುನ್ನತ್ತಾದ ಕಾರ್ಯವನ್ನು ನಿಶ್ಚಿತವಾದ ದಿವಸಗಳಲ್ಲಿ ನಡೆಸಬಹುದೆಂಬುವುದಕ್ಕೆ ಇನ್ನೂ ಹಲವಾರು ಪುರಾವೆಗಳಿವೆ.
      ಇಬ್ನ್ ಉಮರ್ ರಳಿಯಲ್ಲಾಹು ಅನ್ಹು ಹೇಳುತ್ತಾರೆ, " ಪ್ರವಾದಿ ಸಲ್ಲಲ್ಲಾಹು ಅಲೈಹಿ ವಸಲ್ಲಮರು ಎಲ್ಲಾ ಶನಿವಾರ ಖುಬಾ ಮಸೀದಿ ಸಂದರ್ಶಿಸುತ್ತಿದ್ದರು."
( ಮುಸ್ಲಿಂ448/1)
ಇದರ ವ್ಯಾಖ್ಯಾನದಲ್ಲಿ ಇಮಾಮ್ ನವವೀ ರಳಿಯಲ್ಲಾಹು ಅನ್ಹು ಹೇಳುತ್ತಾರೆ,
ಸಂದರ್ಶನಕ್ಕೆ ದಿವಸಗಳನ್ನು ನಿಶ್ಚಯಿಸುವುದು ಅನುವದನೀಯ ಎಂದು ಈ ಹದೀಸಿನಲ್ಲಿದೆ.
( ಶರಹ್ ಮುಸ್ಲಿಂ 448/1)
ಇದರಿಂದ ಝಿಯಾರತ್ ಗಳನ್ನು  ವಾರ್ಷಿಕವಾಗಿ ನಡೆಸುವುದು ಹದೀಸ್ ಗಳ ಮೂಲಕ ಸಾಬೀತಾದ ಕಾರ್ಯವೆಂದು ಸ್ಪಷ್ಟವಾಯಿತು.

ಮುಂದುವರಿಯುವುದು...